«Қувваҳои Мусаллаҳ дар роҳи ҳифзи дастовардҳои истиқлолият, ба эътидол овардани вазъи мамлакат ва пуштибонии сулҳу субот, фурӯ нишондани ошӯбҳои исёнгарона ва зарбаи қатъӣ задан ба ҳамлаҳои берунӣ, несту нобуд кардани гурӯҳ ва дастаҳои мусаллаҳи ҷинояткор, пешгирии табаддулоти ҳарбӣ ва қочоқи маводи мухаддир хизмати беназир намудаанд».
Эмомалӣ Раҳмон.
ҲАДАФИ АСОСИИ ҚУВВАҲОИ МУСАЛЛАҲИ ТОҶИКИСТОН ТАЪМИНИ АМНИЯТИ ХАЛҚУ ВАТАН АСТ.
21 феврали соли 2025 бо иштироки васеи кормандони Дастгоҳи марказӣ ва роҳбарону кормандони муассисаҳои илмии Академияи илмҳои кишоварзии Тоҷикистон бахшида ба Рӯзи таъсисёбии Артиши миллии Ҷумҳурии Тоҷикистон ҷаласаи тантанавӣ баргузор гардид.
Дар ҷаласа собиқадори Вазорати мудофиаи Ҷумҳурии Тоҷикистон, омӯзгори кафедраи ҳарбии Донишгоҳи аграрии Тоҷикистон ба номи Шириншоҳ Шоҳтемур, полковник Қодиров Шамсиддин ва собиқадори Вазорати мудофиа, майор Абдуллозода Ҳикматулло иштирок доштанд.
Нахуст президенти Академия Салимзода Амонулло Файзулло ҳозиринро бо ин санаи фархунда табрику таҳният гуфта, аз ҷумла иброз намуд, ки 23 феврал ба таъсиси Қувваҳои Мусаллаҳи Ҷумҳурии Тоҷикистон, ки яке аз рукнҳои асосии давлатдорӣ ба ҳисоб меравад, 32 сол пур мешавад.
Қувваҳои Мусаллаҳи Тоҷикистон зодаи даврони истиқлол ва яке аз дастовардҳои муҳимтарини он ба ҳисоб рафта, аз рӯзҳои аввали таъсис вазифаи муқаддасу пуршараф – ҳимояи соҳибихтиёрии давлат, таъмин намудани сулҳу субот, ҳифзи амнияти давлат ва ҷомеа ба дӯши онҳо гузошта шудааст.
Дар солҳои аввали таъсисёбӣ вазъият дар ин самт ниҳоят душвор буд. Дар қисмҳои ҳарбӣ шароит он қадар хуб ба чашм намерасид. Хушбахтона, имрӯз Артиши миллии Ҷумҳурии Тоҷикистон ҳама мушкилиҳоро паси сар намуда, ба сӯи қуллаҳои баланд ҳаракат карда истодааст. Дар тӯли 32 соли фаъолият сохторҳои гуногуни ҳарбӣ ба бисёр дастовардҳои назаррас ноил гадид, ки онро дар чанд ҷумла дарҷ кардан ғайриимкон аст.
Ҳукумати Ҷумҳурии Тоҷикистон ба ин самт назари махсус зоҳир намуда, рушди Қувваҳои Мусаллаҳро пояи асосии давлатдорӣ меҳисобад.
Холзода Умаршо — ҳуқуқшиноси АИКТ, собиқ афсари Қушунҳои Иттиҳоди Шуравӣ ба сухан баромада, қайд кард, ки ҳеҷ як давлат бе лашкари тавонову разманда вуҷуд дошта наметавонад. Ин аст, ки давлатдорон барои таъмини амнияти шаҳрвандон ва ҳифзи марзҳояшон ҷузъу томҳои мухталифи лашкар созмон медоданд.
Сарчашмаҳои таърихӣ тасдиқ месозанд, ки давлатҳои Ҳахоманишҳо ва баъдтар Суғду Бохтар, Хоразму Ашкониён дорои чунин лашкари далеру ҷасур буданд.
Артиши миллӣ ҷузъи ҷудонашавандаи мудофиавии ҳар миллату давлат маҳсуб шуда, ҳадафу мақсади аслии он таъмини амнияти халқу Ватан мебошад. Ҳамин тариқ, таъмину танзими сулҳу субот ва бехатарии шаҳрвандон ба дӯши сипари миллат мебошад. Он рамзи интизом, далерӣ ва шаҳомату ватандӯстӣ низ мебошад.
Артиш ҳамчун мактаби мардонагӣ пазируфта шуда, тавассути он сарбозону афсарон ҳамарӯза ба таълиму тамрин машғул мешаванд. Онҳо вазифаҳои пурмасъулиятро ҳушёронаю зиракона иҷро намуда, марзу буми мамлакатро ҳифз менамоянд.
Абдуллозода Ҳикматулло зимни баромади худ ёддовар шуд, ҷумҳурии мо Қувваҳои мусаллаҳи худро дар як замоне таъсис дод, ки кишвари мо дар ҳолати ҷанги шаҳрвандӣ қарор дошт ва хатари аз байн рафтани Тоҷикистон ва пароканда гардидани миллати тоҷик ба миён омада буд.
Ҳар давлат фақат бо қудрат ва тавоноии артиши худ метавонад дар арсаи байналмилалӣ мақоми низомияшро муаррифӣ созад. Артиш ҷузъи муҳими давлатдорӣ буда, кафили асосӣ барои пойдории давлат ҳисобида мешавад.
Барои ҷумҳурии тозаистиқлоли Тоҷикистон таъсиси Артиши миллӣ осон набуд ва аз ҳама муҳимаш базаи моддиву техникӣ талаб менамуд. Дар фурсати кӯтоҳ ташкил намудани он кори саҳл набуд ва барои ин вақт зарур буд. Вале ба ҳамаи ин нигоҳ накарда, Президенти Тоҷикистон муҳтарам Эмомалӣ Раҳмон Артиши миллиро таъсис доданд ва 23 феврал аввалин гузашти ҳарбӣ дар Ҷумҳурии Тоҷикистон баргузор шуд.
Имрӯз афсарони далеру ҷасурро зарур аст, ки бо руҳияи ватандӯстию садоқат ба Ватану савганди ҳарбӣ ва ҳушёрию зиракии сиёсӣ марзу буми Ватанро содиқона ҳимоя намоянд.
Кормандони ҷавони Академия Рӯзиматова Бибиоиша ва Холов Зеваршо дар васфи Ватан ва Артиши миллӣ шеърҳо қироат карда хотири иштирокдоронро болида гардониданд.
Дар фарҷоми чорабинии идона ба собиқ афсарони интернатсионалист, ки имрӯз дар сафи кормандони Академия кору фаъолият доранд, туҳфаҳои хотравӣ супурда шуданд.
